యాపిల్ ఫోల్డబుల్ ఫోన్ మన్నిక ఎంత?.. యూట్యూబర్ ప్రయోగం చెప్పిన నిజాలు!

టెక్నాలజీ ప్రపంచంలో ఫోల్డబుల్ ఫోన్ల హవా నడుస్తున్న వేళ, యాపిల్ నుంచి అలాంటి ఫోన్ వస్తే దాని మన్నిక ఎలా ఉంటుందనే ఆసక్తి అందరిలోనూ ఉంది. ఈ నేపథ్యంలో మీడియాస్టార్మ్ ఛానెల్‌కు చెందిన ప్రముఖ యూట్యూబర్ టిమ్ పాన్, సుమారు 2వేల డాల‌ర్లు (సుమారు రూ. 1.9 లక్షలు) విలువైన 'ఐఫోన్ డ్యుయో' అనే ఫోల్డబుల్ ఫోన్‌పై కఠినమైన డ్యూరబిలిటీ పరీక్ష నిర్వహించారు. ఈ ప్రయోగంలో ఆసక్తికరమైన ఫలితాలు వెల్లడయ్యాయి.

ఈ పరీక్ష కోసం ఒక ప్రత్యేకమైన మెషిన్‌ను ఉపయోగించారు. తొలుత గది ఉష్ణోగ్రత వద్ద ఈ ఫోన్‌ను ఏకధాటిగా 10,000 సార్లు మడిచి తెరిచారు. అనంతరం మరింత కఠినమైన పరిస్థితుల్లో దాని పనితీరును పరిశీలించేందుకు, సుమారు మైనస్ 20 డిగ్రీల సెల్సియస్ గడ్డకట్టే చలిలో అదనంగా మరో 1,000 సార్లు ఫోల్డ్ చేశారు. మొత్తం 11,000 మడతల తర్వాత ఫోన్ పనితీరును విశ్లేషించారు.

హింజ్ పటిష్ఠం.. డిస్‌ప్లే బలహీనం
ఈ సుదీర్ఘ పరీక్ష తర్వాత ఫోన్ 7.6-అంగుళాల అంతర్గత డిస్‌ప్లేపై ఉన్న క్రీజ్ (మడత) మరింత లోతుగా, స్పష్టంగా కనిపించడం ప్రారంభించింది. స్క్రీన్‌పై ఉన్న మ్యాట్ ఫినిష్ సాధారణ వెలుతురులో కాంతిని తగ్గించి, క్రీజ్‌ను కొంతవరకు కనిపించకుండా చేసినా, పెరిగిన మడతను మాత్రం దాచలేకపోయింది.

అయితే, డిస్‌ప్లే విషయంలో నిరాశ ఎదురైనా, హింజ్ మెకానిజం మాత్రం అద్భుతంగా పనిచేసింది. 11,000 మడతల తర్వాత కూడా హింజ్ పనితీరులో ఎలాంటి మార్పు రాలేదని, ఫోన్‌ను తెరిచేటప్పుడు, మూసేటప్పుడు అది చాలా స్మూత్‌గా ఉందని టిమ్ పాన్ తెలిపారు. దీంతోపాటు ఫోన్‌ను వెనక్కి వంచే స్ట్రక్చరల్ టెస్టులో భాగంగా దానిపై 37.8 కిలోగ్రాముల బలాన్ని ప్రయోగించినా పెద్దగా నష్టం జరగలేదని తేలింది.

ఇది కేవలం ఒకే పరికరంపై నియంత్రిత వాతావరణంలో చేసిన ప్రయోగం మాత్రమేనని, ఇది యాపిల్ నుంచి వచ్చిన అధికారిక రేటింగ్ కాదని గమనించాలి. సాధారణంగా ఒక యూజర్ రోజుకు 100 సార్లు ఫోన్ మడిస్తే, 10,000 మడతల మార్కును చేరుకోవడానికి సుమారు మూడు నెలలు పడుతుంది. ఈ పరీక్ష ద్వారా ఫోల్డబుల్ ఫోన్లలో హింజ్ టెక్నాలజీ పరిణితి చెందినా, డిస్‌ప్లే క్రీజ్ ఇప్పటికీ ఒక సవాలుగానే ఉందని స్పష్టమవుతోంది.